Ao remate desta entrada reproducimos literalmente as correctas , precisas e matematicamente ben razoadas respostas que deron estes alumnos /as .
UN PROBLEMA PARA AS VACACIÓNS
Estimados alumnos/as : vouvos
plantexar eu , como voso titor, este problema que ten algo de real , un pouco
de conto e , se cadra , de lenda máis ou menos urbana do vello barrio coruñés
de Monte Alto .
O conto
Resulta que no lugar que hoxe ocupa o Polideportivo do Club
do Mar de San Amaro había unha charca moi grande coñecida polo nome de A Ría ,
de cando en vez visitada polos que fomos veciños de Monte Alto e sobre todo dos
que fomos moradores da Agra de San Amaro durante moitos anos. Parece ser que
tempo antes fora un brazo de mar, o cal chegaba ata alí mesmo e de aí o nome .
Disque preto da ría houbo un vello e ruinoso castelo.
Pois ben, da marxe norte da Ría xurdía un carreiro empinado
que ía dar a unhas fontiñas cun vello lavadoiro e outra charca máis pequena.
Estoutra charca é o escenario para o noso problema.
A charca estaba habitada por unha tribo de ras e sapos que
mandaba unha vella ra , tan vella como lista e testuda , chamábase Frogha
. O feito que a xefa fora unha ra non era ben visto por algúns sapos (unha
minoría deles, o grupo opositor) e tamén por algunhas ras que andaban sempre
moi alporizadas e que opinaban que os sapos tiñan máis nivel e que por
tanto tiñan que mandar porque si.
A lenda conta que unha noite de verán achegouse
á charca un exército de bichos de dimensións enormes . Alí estaban:
1. Lesmas baballando ao fronte
2. Píntegas con debuxos de
guerra na súa pel
3. Escornabois remexendo o ar
cun barullo infernal
4. Vagalumes alumeando a noite
e converténdoa nun dia de pavorosa luz
5. Saltóns movéndose en zigzag
como chuvia de frechas.
Ameazaban con comer todo e expulsar a tribo de batracios alí
existente.
A xefa da tribo convocou unha xuntanza de urxencia e
explicoulles aos alí reunidos que para derrotar a todo aquel
exército existía un determinado elixir de veleno. Pero que
tiñan que saber a cantidade exacta de veleno a preparar para cada
bicho senón non faría efecto.
O xefe do grupo de sapos opositores, chamábase
NAPOLEÓN , aínda que el quixera que a súa nai lle puxera de nome AUGUSTO CÉSAR
. Era un sapo bastante voluminoso, torpe , de carácter
faltón , con fama inmerecida de chistoso , e fachendoso ata a
náusea ( había quen aseguraba que podía ser medio sapo e medio lesma dado
as cantidades de baba que deixaba o seu paso). Pois ben, NAPOLEÓN dixo
que aquilo era unha parvada e que só a unha ra se lle podía ocorrer tal cousa.
Os poucos seguidores sapos que tiña aplaudiron ese comentario “enxeñoso”
axitando as engurras do pescozo e tamén o fixeron as ras da súa corda , moi
alporizadas, e que asentiron mentres berraban e repetían “Ai si , que é un gran sapo e sempre ten razón !!
O resto, a inmensa maioría da asemblea da tribo
das ras e sapos , fixo un respectuoso silencio cando Frogha, a
xefa, seguiu describindo o complicado escenario do conflito que se
achegaba. Falou con voz tranquila e firme.
-Se lles permitimos que entren na nosa charca non
quedará nada útil, nada que pague a pena , nin comida para nós nin
augas limpas para poder beber e nadar en liberdade .
O PROBLEMA
Aplica o que coñezas sobre dobre, triple,metade, hectolitros
, centilitros e litros para axudar a Frogha a derrotar ao exército
de bichos e polo tanto contesta a estas
4
Preguntas
Veñen un camión e unha furgoneta cargados con
todo o elixir de veleno que van utilizar. O camión trae 4 hl de
elixir de veleno e a furgoneta trae 200 cl.
1. Cantos litros de elixir traen en total entre o
camión e a furgoneta ?
2. Para acabar cos escornabois precisan a
metade do total de litros . Cantos litros
precisan exactamente ?
3. Para acabar cos saltóns e as lesmas precisan
o triple de 50 litros . Cantos litros precisan
exactamente ?
4. Para acabar cos vagalumes e as
píntegas precisan o resto de elixir de veleno que
lles quedou aínda sen usar despois de haber acabado cos outros bichos .
Cantos litros precisan exactamente ?
Conta a lenda que esta batalla puido ser gañada, que Frogha
confirmou o seu poder e seguiu gobernando con xustiza a tribo durante
moitos anos e que chegaron a un acordo de convivencia pacífica con
toda a bichería de San Amaro e Monte Alto compartindo espazos de charcas
, lameiros e prados .
A partir daquela batalla sapos e ras
sabían que para os seus fillos e fillas , o mérito e o traballo era
o criterio fundamental para ser elixido xefe ou xefa da tribo e que daba
igual que foras ra ou sapo , gordo/a ou fraco/a , novo/a ou
vello/a, cos ollos vermellos , marróns ou laranxas metalizados, ter a pel
amárela , branca, negra ou marrón silvestre , ser nado en Beirut ,
en Berlín ou en Coirós, ser fillo ou filla de Xan ou de Pericán , ser amigo ou
amiga de fulano ou de mengano...
Como afirmaba nalgunhas ocasións Frogha
“Gobernar unha tribo de ras e sapos é máis complicado que
rexir unha granxa. As ras e os sapos son xente... xente moi intelixente , aquí as
cousas hai que facelas con xeito” .
Tamén cóntase que
NAPOLEÓN cambiou, cambiou e cambiou , e tanto cambiou no futuro,
que un día as ras e os sapos da súa corda , que en si non eran malos/as ,
máis que nada faltáballes un fervor/ura , regaláronlle un trofeo moi grande, pero que
moi grande… E de ouro ! Para que puidera seguir facendo o que máis lle
gustaba: presumir diante das ras e os sapos .
E disque as ras ( as
da súa corda , non as outras ) , mesmo ás veces achegábanse a el croándoo co poderoso , emblemático e suxestivo nome de AUGUSTO CESAR FILEMÓN
.
Cando se retirou da charca ninguén o botou de menos agás ... as ras e sapos da súa corda .
Xa cerca do seu retiro déronlle unha coroa de loureiro cunhas floriñas
nun día que orballaba de abondo na Ría de San Amaro .
Pero isto … xa é outra historia, tamén con enjundia , e excede,
obviamente, o contido do noso interesante problema.
Respostas a este problema ao correo do
blog , como comentario á entrada ou á volta ao colexio.
Pasade unhas boas vacacións e recargade as
baterías .
Carlos
*** RESPOSTAS CORRECTAS QUE NOS ENVIARON ***
MANU , LOIS , HUGO , EIZÁN , SOFÍA ÁLVAREZ E BRAYAN ENVIARON POR DIFERENTES MEDIOS O PROBLEMA ASÍ CONTESTADO PARA AXUDAR A FROGHA
1. 402 litros
4 hectolitros son 400 litros
200 centilitros son 2 litros
400+2=402 litros
2. 201 litros
402:2=201 litros
3. 150 litros
50×3 =150 litros
4. 51 litros
201+150=351 litros
402-351=51 litros
Para saber que está bien sumé :
201+150+51=402 litros.
LUCILA
SOFÍA MALAGÓN
FF
